بقلم وتصميم .. فاطمة سيد احمد (العامرية)
الفصل الأول: بداية الحلم في رمضان 🌙
اللهم صلِّ وسلِّم وبارك على سيدنا محمد ﷺ
قال الله تعالى: ﴿وَرَتّلِ الْقُرْآنَ تَرْتِيلًا﴾
في أول يوم من أيام شهر رمضان، صحِيَ عامر ومروان على صوت أذان الفجر.
البيت كان هادي، ونور خفيف داخل من الشباك، وصوت قرآن جميل طالع من الراديو ومليان طمأنينة.
عامر، تلميذ الصف الخامس الابتدائي الأزهري، قام بسرعة، توضّى ووقف جنب بابا في الصلاة.
أما مروان، تلميذ الصف الثالث الابتدائي، فكان بيقلده خطوة خطوة، وهو مركز وبيحاول يعمل زيه بالظبط.
بعد الصلاة، قعدوا كلهم سوا، وبابا فتح المصحف، وماما قعدت جنبهم بابتسامة هادية.
قالت ماما بصوت مليان حُب: «رمضان مش بس صيام يا أولاد ده شهر ترتيب القلب، واللي يجتهد فيه ربنا يفتح له أبواب خير كتير.»
بص عامر لمروان وقال بحماس:
«إيه رأيك نبدأ من النهارده تدريب بجد؟
نفسي أوصل لبرنامج التلاوة.»
رد مروان وعينه بتلمع: «وأنا كمان! نفسي أطلع متسابق، ونتقابل هناك سوا.»
ابتسم بابا وقال بهدوء:
«القرآن يا أولاد عايز نية صافية، وأدب، وصبر قبل ما يكون صوت.» 📖
روتين أبطال التلاوة
بعد الإفطار بساعتين، كان لكل واحد وقت ثابت: عامر مسك المصحف، وراجع حفظه بهدوء، يوقف عند كل آية، ويصحّح مخارج الحروف.
مروان حفظ آيات قصيرة، وفضل يكررها بصوت واضح، وماما تسمع له وتشجعه.
قالت ماما بفخر: «ربنا يحفظكم أنتو فخر، ومش كل بطل صوته عالي، في بطل قلبه متعلق بالقرآن.»
🌟 حلم كبير قبل المغرب، قعد عامر ومروان جنب الشباك، بيتفرجوا على السماء.
قال عامر بصوت واطي: «نفسي في يوم أقابل فضيلة الإمام الأكبر الدكتور أحمد الطيب، وأسلم عليه.»
رد مروان بابتسامة: «وأنا نفسي أبقى زي العلماء الكبار اللي خدموا القرآن، زي الشيخ محمد متولي الشعراوي.»
ضحكوا الاتنين، وقال عامر: «أنا أبقى زي شيخ الأزهر.»
قال مروان بسرعة: «وأنا أبقى الشعراوي !»
ابتسمت ماما، وقالت
بحكمة: «العلماء دول وصلوا بالمجهود، والقرآن، والأخلاق واللي يمشي على الطريق، ربنا يوصله.»
رفعوا إيديهم وقالوا مع بعض:
«يا رب نكون من أبطال التلاوة، وندخل البرنامج سنة 2027.»
وكان الحلم لسه في أوله
نشاط
🤔 إيه أكتر حاجة بتفرّح عامر ومروان في رمضان؟
⭐ مين فيهم عايز يبقى بطل التلاوة؟ ولا الاتنين؟
📖 تلاوة اقرأ سورة الإخلاص بهدوء.
ركّز في نطق الحروف صح.
سلوك قول أو اكتب عمل كويس هتعمله النهارده علشان تسعد ماما أو بابا.
رسالة الفصل الأول
البطل الحقيقي مش اللي صوته حلو وبس البطل اللي بيحب القرآن، ويصبر عليه، ويعمل بأخلاقه كل يوم.
حمل مجانا كتاب على خطى الرسول: أطفالنا مستقبلنا”
– للمزيد اتبع الرابط التالي – https://nesral3roba.com/?p=128294
مغامرات عامر ومروان في رمضان!
كل عام وانتم بخير 
جاهزين تعيشوا المغامرة مع عامر ومروان؟ قصص مشوّقة وأحداث رمضانية ممتعة بانتظاركم!