بقلم الشاعرة / عواطيف درويش
متابعة الصحفى / سامح الخطيب..
إيه اللي شايفاه ع الوشوش!
إنطفى الصبح البشوش
مش شايفة فيها غير رتوش
فيها انقهَر قلب الوحوش
الصبر ساكن سِكّتي
والدمعة تحكي غنوتي
حتى الهوي
مُرُّه بيروي مهجتي
مش سامعة غير
صوت الأنين
مكتوم حزين
على حلم عمري
ويَّا السنين
لِيْله يفرَّق القريب
والصبر منُّه صَبَح غريب
الفجر عمره ما كان بعيد
وأماني فيها نهار سعيد
والحِلْمْ راجع من تاني
قولت خلاص أنساه يا زماني
أصله كمان فرمان عثماني
نازل يُفرُم أي أماني
بسأل ليه الناس بقي تايهة؟
قول يا ولد
الناس دي تايهة ولّا إيه؟
ولا الطريق هو اللي تاه!
ولا كمان دخل المزاد!
أندَه واقول
إن الطريق مش للمزاد
وبالأمل يتولد أعظم مداد
والحب ليكي زاد
ونقول كمان زواد
محتاجه للساعد
والكل يتساعد
نحط إيد في إيد
يصبح نهار جديد
ويجمع الأيادي
حبك مالي فؤادي
خَلَيَ المشاعر تتولد
تاني من جديد
ساعتها تعرف يا ولد
إن الأمان
اِتولد
وبعزمكم
صبح حديد.