بقلم: د. عزة محمود
بين الثانية والثانية مصير العمر متقدر
بين الخطوة والتانية حاجات في الدنيا تتغير
ونتلاقى ونتفارق وبنفرح ونتضايق
لكن ف حياتنا شيء فارق بيلمس روحنا ونعبر
نقول يمكن حنان روحنا ويمكن حتى ملامحنا
عشان بنعدي ١٠٠ محنة أكيد ف قلوبنا بتأثر
ساعات الوهم بياخدنا لشيء في الحلم يراودنا
ولما نمد له إيدنا بترجع فاضية بتصفر
ولا بنقدر نفوت الحلم وتبقى حياتنا زي الفيلم
ويتعاد فينا حرب وسلم وأحداثه بتتكرر
لكن جوه صراع الروح وصرخة قلبنا المدبوح
عيوننا بالحنين بتبوح وشوقنا ف قلبنا بيكبر
ونسأل روحنا يوم ورا يوم مين غالب ومين مهزوم
وبنضحك بصوت مكتوم وبنداري قوي ونصبر
حبيبي أنت فاهم ليه حنين قلبي بداري عليه
وراضية وعايشة ف اللي أنا فيه وحاسة إن الحياة سكر
عشان حاساك ف كل مكان وقلبك للحنان عنوان
أنا أخترتك تكون لي أمان وعمري ودنيتي وأكتر