بقلم الشاعرة / سميرة محمودى
شاعرة الريف
متابعة/ سامح الخطيب..
داري دموعك والقلق
علي كل شئ بيضيع
وبلاش تعيد ف اللي جرى
وتفتح المواضيع
وبلاش ف نفس الأمكنة
تفرد شراع أحلام
وتمر تاني بالزمن علي
ضحكة الأيام
دا الضحك حلو ف أوله
وف أخرته تدميع
بياع ومين اللي اتجرح
غير قلبك المسكين
مافيدش فيك طعم الدوا
ولا حبة التسكين
تعبان رماك الهوي
والبحر فيه إعصار
غرقان ومين ينقذك
او خد بإيدك مين
مغرور وكان مشتاق
يتهني بدموعك
هد المشاعر كلها
خرجها من طوعك
ومشيت فى سكة ندم
ع الحب كان يا ما كان
كان فيه حبايب هنا
سكاكينها ف ضلوعك
فرشوا العذاب اكفان
من غير ما يتحسوا
ولا كنش فيه إحساس
ولا هما بيحسوا
وياريت ما نادوا إليك
او جم ف يوم جارك
وياريت ما عدوا عليك
او صبحوا ومسوا
خبي انشطارك م الوجع
في كاسين من التوهان
دى المزة عندك من زمن
اطنان من الحرمان
ادمن ف جرح بيعشقك
قفل عليك الباب
دىاللعنة منه بتحرقك
مافيدش فيها عتاب
عطفك حنانك رقتك
كان كله كدب وزيف
حبك فى قلبك كان غضب
ملعون ف كل كتاب
باضحك عليك لما افتكر
ف القرب لما تدوب
في الصبر
شوف حضرتك
غيرت فيه كام توب
صبرت ع المظلمة
والغدر والنكران
صبرك دا كان معجزة
وغلبت فيه أيوب
ضيعت عمرك شقا
وجريت له بالمشاواير
صبيت كاساتك ضنا
وشربت منها كتير
لا شفت يوم فرحتك
دايرة بتتهنى
ولا عشت يوم للفرح
والطبل والمزامير
داري دموعك وابتسم
واضحك كما المجانين
كان ليه جنونك يخدعك
ويتوهك ياحزين
تايه في ليل الهوى
للآهة تستنى
حبيت فى خاين خونك
وشبعك تخوين
عاشق وضهرك
دا انحنى م الظلم
والأيام
شايل بطول رحلتك
اوهام على اوهام
سبت الحياة تعلمك
كام درس للاحزان
وجراحك المدمنة ما
يكل فيها علام
كان ليه بتحلم بالوفا
ف الدنيا والإخلاص
كل اللي علمته الوفا
علم عليك وخلاص
خلوك تطير ف السما
وانت بغير جناحين
لا عرفت فين سكتك
ولا حتى رايح فين
وقعت من سابع سما
ع الارض طير مجروح
مين حس بيك أو يوم
عرف جرحك دا جي منين؟!