*سفير التضامن حلقات نقدمها يوميا طوال شهر رمضان المبارك عن مستفيدين حققوا نجاحات من خدمات وزارة التضامن الاجتماعي.
سفيرة التضامن النهارده بطلة، بطلة من طراز مختلف، اتحدت الإعاقة والظروف وكمان غيرت مجال عملها تماما.. تعالوا نعرف ده حصل إزاي
فاطمة وارث بتحكي وبتقول: “أنا كنت ست عادية جدا بشتغل مدرسة في مدرسة وفي يوم تعرضت لحادث غيّر حياتي وحولني من مدرسة إلى صانعة حرف يدوية؛ قررت إني مش هفضل عاجزة وإني قعدتي على كرسي متحرك مش هتقيد حركتي وطموحي، فاشتغلت في الأول في الكروشيه والصوف وبعد كدة حاولت أطور في صناعتي علشان تتناسب مع العصر الجديد مع الحفاظ على القديم وحولت الهواية بتاعتي لمشروع وإن شاء الله يتحول لمشروع كبير”.
طيب كان دور وزارة التضامن إيه في الحدوتة الملهمة دي ؟
فاطمة قدمت إنها تشارك في معارض الأسر المنتجة التابعة لوزارة التضامن الاجتماعي بأعمالها وبالفعل منتجاتها لاقت استحسان وإعجاب كل اللي شافوها ومش بس كده ، فاطمة دلوقتي من أهم وأكبر العارضين اللي بيكون ليهم مكان في معارض ديارنا اللي بتنظمها الوزارة على مدار العام في المحافظات المختلفة وطبعا المعرض الرئيسي اللي بينظم سنويا في أرض المعارض .
وزي ماحنا عارفين إن وزارة التضامن الاجتماعي بتدعم أصحاب الحرف اليدوية والصناعات التراثية من خلال معارض ومنافذ الأسر المنتجة المنتشرة في جميع أنحاء الجمهورية ده غير المعارض اللي بيتم تنظيمها بشكل دوري وثابت مش بس داخل مصر لا وخارجها كمان في مختلف دول العالم زي إيطاليا وفرنسا وأمريكا والإمارات وعمان وغيرها.