عدى عمر طويل ف غربة
كل لحظة تمر صعبة
ماتت الأفراح ف بعده
من ثواني أنا كنت شابة
كل حاجة تروح ف ثانية
والقى نفسي ف دنيا تانية
روح بتشتاق تاني ترجع
رغم إن الدنيا فانية
بس كان لوجوده فرحه
لمسة حلوة.. أرق لمحة
فجأة غاب عن عيني لكن
ساب في قلبي كلمة جارحة
كلمة الحب اللي كانت
أحلى كلمة فجأة هانت
كل رغبة عشاني ماتت
عمري يوم ما هاكون مسامحة
فين صباحه الحلو ليا
لما كان يشتاق لصوتي
كل ده جرح وسابه فيا
يعني كان يتمنى موتي؟
نفسي أنكر كل حزني
وأنسي وجعي وإيه جرى لي
كان يقول مشتاق لحضني
شفت حاله زي حالي
وابتدت بيننا المحبة
فجأة راحت حبة حبة
درس قاسي كسر لي قلبي
ليه أخبي… جروحي صعبة
بس رغم القسوة ديه
لسه فيه له حاجة فيا
يمكن الذكرى اللي كانت
حتى لو بكت عينيا
آه يا قلبي…. قد حبي
قد فرحة بقت أسية
لما كان يتمنى قربي
والحنان بيشده ليا
هانسى صوته وقت فرحه
كل لمحه من ملامحه
حتى لو قلبي مسامحه
نقطة الضعف اللي فيا
يوم فراقنا
بقلم رئيس القسم الأدبي
د. عزة محمود علي