🎭 رانيا فريد شوقي تحكي كواليس شخصية “إيناس” في يتربى في عزو:
“كنت مرعوبة واعتذرت عن الدور في الأول!”
كشفت الفنانة رانيا فريد شوقي من خلال منشور لها على السوشيال ميديا عن كواليس مشاركتها في مسلسل يتربى في عزو، وتحديدًا شخصية “إيناس” اللي علّمت مع الجمهور، وقالت:
“أول ما اتعرض عليّا الدور… كنت مرعوبة!
خفت أعمله، وفعلاً اعتذرت.”
وأضافت:
“لكن فجأة اتصل بيا د. يحيى الفخراني بنفسه، وسألني:
إنتي اعتذرتي؟!
قلت له: آه، خوفت شوية.
قاللي بكل ثقة:
ما تخافيش… الدور حلو وهيفرق معاكي كتير.
وبالفعل… كان من أنجح أدواري وساب علامة كبيرة ❤️”
🤫 ومن كواليس التصوير…
حكت رانيا عن مشهد في شرم الشيخ، وقالت بنبرة فكاهية:
“كنا بنصور مشهد المفروض فيه إن إيناس و حمادة (يحيى الفخراني) بيخرجوا سوا، وهي أصلاً كانت ناوية تتلكك على أي خناقة عشان تسيبه 😆
وفجأة في السهرة لقينا رقاصة بتتدلع عليه!
ولقيت إيناس بتزغر للرقاصة و لحمادة، ووشها قلب بوز، وعينيها بتولع شرار!
اتاريهم كانوا يعرفوا بعض 😏
فقلبتها نكد وسبته ومشيت!”
واختتمت الموقف بطريقة ضاحكة:
“وإحنا بنعمل بروفة، لقيت د. يحيى بيضحك جدًا، قلتله: في إيه؟!
قاللي:
الله يكون في عون اللي هيتجوزك! ده مش تمثيل أصلاً! 😂”
الدور فعلاً نجح بشكل كبير، و”إيناس” فضلت واحدة من الشخصيات اللي الجمهور لسه فاكرها لحد النهاردة!