بقلم / رضا ابو الغيط
متابعة / سامح الخطيب
بيورق
حلمي المتعلق
ف مهب الريح
وبيطرح
فجر وبيشقشق
من غير تصاريح
وبإيده دايما بيفرق
ع الناس تفاريح
من غير ما يحاول يتراجع
قدام الآه
وللا حتي يسلم لمواجع
كات طارحه معاه
مفاتيح الخير المتربع
دايما جواه
ويقول بحروفه اللي بتطرح
ورد البساتين
من بكره خلاص لازم نفرح
ونسُر العين
برايات السلم…. اللي بتملا
كل الميادين
والحق الطارح ف مطارح
وكلامه صريح
بيورق
حلمي المتعطر
وبيرسم باللون الأخضر
أفراحي الجايه بتتمخطر
شايله المصابيح
ومناها تطلع ع الأزهر
بعد التراويح
وتنادى ع الحلوه بلادى
تركب مراجيح
وتطول الشمس اللي بتطرح
حُب وتسابيح
وتقابل م الشمس سنابل
طارحه لنا العيش
ومناها نعيش
أيامنا الجايه بتتهادى
علي شط النيل
وف إيدها دايما كالعاده
نور القناديل
وصورنا تبقي ف الساحه
فوق أعلي أفيش
مع كل الناس اللي بتحلم
ما تعيش مجاريح
ومناها تطرح أحلامها
سعد وتفاريح